Guggenheim Bilbao Museoak Iñaki Garmendia, Erlea Maneros Zabala eta Xabier Salaberria euskal artisten Prozesua eta metodoa izeneko erakusketa paratu du 2014ko otsailaren 14era arte. Erakusketa hiru ataletan egituratuta egon arren, elkarren arteko loturak ere badira.
Lucía Agirre eta Alvaro Rodriguez Fominaya komisarioen hitzetan, “hiru artisten arteko berrelikadura-prozesu bat gertatzen da”. Izan ere, Bilboko museoak hiru ataletan atondu du erakusketa, artisten ibilbidea aztertzeko asmoz. Horretaz gainera, artistek berariaz sortutako lan berri bana jarri dute ikusgai; “erakusketa amaituta, Guggenheim Bilbao Bildumara sartuko dira”.
Aipatutako hiru artisten arteko lotura ez da agerikoa, ezkutukoa baizik, eta harreman hori “Historia” omen da, “ikerketarako gaitzat hartzen baitute eta etengabe berraztertzen baitute”. Hala, historia bereganatuz eta deseraikiz, “berregite- eta berrinterpretatze-prozesuak baliatzen dituzte arteaz duten ideiara hurbiltzeko”.
