Big Band Festival jaialdiaren XIII. edizioa Gasteizko Falerina gunean egingo da, ostiralean eta larunbatean. Guztira dozena erdi banda arituko dira jaialdian, eta askotariko estiloak haizatuko dituzte: funk, rhythm and blues, jazz, soul, hip hop…
Hala, ostiralean, Gasteizko Big Band Berri eta Dani Perez saxo-jotzaileak zuzendutako Big Dani Perez Saxplosion bandak arituko dira, 20:00etatik aurrera. Dani Perez eskarmentu handiko musikaria da, gehienbat rock esparruan egindako ibilbideagatik.
Larunbateko egitaraua Raúl Romo musikari gasteiztarrak gidatutako The Farra Marching Banden emanaldiarekin hasiko da, 13:00etan. Iluntzean, halaber, 20:00etatik aurrera, B3 Dixieland (oraintsu zendutako Rafa Arenas saxo-jotzailea omenduko du), Gasteiz Big Band eta The Correspondents bandak izango dira agertokian.
Informazio gehiago: gasteizbigband.com.