Pamiela argitaletxeak plazaratu du Tere Irastortzaren (Zaldibia, 1961) Eta orain badakit poemategia. Zaldibiarrak zoriontasunari buruzko hausnarketa egin du liburuan.
Amodioa, laguntasuna, amatasuna edo bakardadea dira, besteak beste, Irastortzak liburu berri honetan jorratu dituen gaiak. Idazleak bakarrizketa erabili du gaiok lantzeko; beti ere, norbaiti esateko beharra nabarmenduta.
Batzuetan hika erabili du poemetan; beste batzuetan, berriz, zuka. Izan ere, autorearen iritziz letrek gizartea sortu behar baitute, alegia, elkarrekiko erlazioa. Lan hau, gainera, Karmele Igartua poeta eta lagunari eskaini dio.
Poemok azken hamar urteotan idatzi ditu, eta iazko lehen lau hilabetean taxutu ditu.
