Elena Mendizabal eta Mónica Ortuzarrek, eskultore eta pintore bilbotarrek hurrenez hurren, haien lanak bildu dituzte Kolorea izenburuko erakusketan, Bilboko La Taller galerian; erakusketa, hain justu, atzo inauguratu zen eta zabalik egongo da apirilaren 14ra arte.
Bi artistek badute zenbait elementu komunean: batetik, Nia behaketa-objektu eta abiapuntu gisa; bestetik, obren gauzatze plastikoa; hots, ez dira aurretik fabrikatutako objektu edo irudietatik abiatzen, baizik eta paper edo mihise zuri edo buztin edo plastilina bloke batetik.
Halaber, badute hirugarren ezaugarri komun bat: keinuaren presentzia, bai pintzeladetan zein modelatuan, prozesua nabarmentzeko, markak mantenduz, eta akabera zainduak saihestuz.
Aipatutako guztiari, kolorea gehitu behar zaio, La Taller gunean paratutako obren ezaugarri garrantzitsuena kolorea baita: kolorezko plastilinak, akuarela dirdiratsuak, arkatz trazuak…
Informazio gehiago: lataller.com.
