Musika programazio anitza eskainiko duen Antioko Musika Zikloaren 41. edizioa irailaren 7, 14, 21 eta 28an izango da. Lau hitzordu horietarako, Suhar Korua, Musbika Ensemble, Iñaki Salvador Quartet eta Daniel Bertomeuren emanaldiak ondu dira.
Diogun moduan bihar abiatuko dira kontzertuak, eta lehen zita horretan Suhar Korua arituko da Esteban Urzelairen zuzendaritzapean. Suhar gizonezko ahots grabeen abesbatza bat da, eta 2018ko udazkenean hasi zen kantu koralean. Suharren balioen artean nabarmentzekoak dira “bere proposamen artistikoen kalitatea; gure musikagileen obraren hedapena, gure musika koralarekiko konpromisoan oinarritua, eta berritzeko eta sortzaile izateko ahalegina”.
Datorren astean, hilak 14, Musbika Ensemble taldearen txanda izango da. “Musika klasikoari eta antzinako musikari egozten zaizkien oztopoak eta klixeak gainditzeko asmoz, eszenaratze fresko eta dinamiko bat proposatzen du taldeak, edonor harrituta uzteko eta musika honekin gozatzeko aukera eskainiz”.
Irailaren 21ean, Iñaki Salvador Quartet taldeak (Iñaki Salvador (pianoa, moldaketak, musika-zuzendaritza), Ainara Ortega (ahotsa), María Berasarte (ahotsa), Hasier Oleaga (bateria), eta Angel Unzu (gitarrak, buzukia, perkusioa) Txoria nuen maite: Laboa gogoan izeneko saioa eskainiko du.
Hitzordu horretan, taldeak “Mikel Laboaren musika berrikusiko du, musika inprobisatuaren eta jazzaren estetikatik abiatuta. Oraingo honetan, eta lehen aldiz Laboaren irudiaren inguruan Salvadorrek egindako proiektuetan, testuak abestuta, ahotsa funtsezko tresna gisa erabiliz Laboak aukeratutako poesia zein euskara lehen lerroan jartzeko. Horretarako, karrera sendoa duten artista ospetsuen banda bat eratu da. Moldaketak eta egokitzapenak Laboak besarkatu zituen hiru ildo eta konpromiso artistikoek inspiratu dituzte: tradizioaren errespetua eta ezagutza; poesia eta sorkuntza garaikidearen inguruko lana; eta ikerketaren eta abangoardiaren aldeko apustua”.
Azkenik, irailaren 28an, Daniel Bertomeu piano-joleak Un viaje por el romanticismo izeneko kontzertua eskainiko du.
