Homofobia iraganeko kontua da. Sexu eskubideak=giza eskubideak izeneko erakusketa ikusi ahal izango da Elorrioko Iturri kultur etxean, ekainaren 30era arte. Erakusketa Elorrioko Udalak antolatu du ekainaren 28an LGTB kolektiboaren sexu askatasunaren nazioarteko eguna dela-eta.
Erakusketaren barruan hamahiru panel jarri dira hainbat mezu zabaltzeko asmoz: Sexu eskubideak giza eskubide dira; Giza eta Sexu eskubideak unibertsalak dira, alegia, batak zein besteak garrantzi bera dute, eta ez daude kultur tradizioen edo sinesmenen mende; Sexu aniztasunarekiko eta LGTTBIenganako fobia munduan zehar zabalduen dagoen gorrotoetako bat da; Zenbait herrialdetan, oraindik ere, LGTTBIak jazarri eta hil egiten dituzte; LGTTBIei giza eskubide funtsezkoenak bizitzeko eta aske izateko eskubideak ukatuz jarraitzen duten estatuak zein diren esan eta salatu egin behar dira; Gero eta herrialde gehiagok egiten dituzte bereizkeriaren aurkako legeak partaideen adostasun osoz burutzen diren sexu jardueren jazarpen orori kontra egiteko, nahiz eta baden oraindik zer aurreratua; eta azkenik, LGTTBIak jazartzean eta haiei eraso egitean gizatasuna galtzen dugu.
