Bilboko FAS zineklubak proiekzio berezia egingo du gaur, ekainak 7, El Carmen aretoan: nazien kontzentrazio-esparruetatik Frantziara itzuli ziren juduei buruzko Après les camps, la vie (Frantzia, 2009 ) dokumentala. Emanaldia 19:45ean hasiko da eta bertan Virginie Linhart filmaren egilea eta Luisa Etxenike idazlea izango dira.
Linhart-ek berak idatzitako La vie après izenburuko liburuan oinarritzen da filma. Cultura a mano eta Institut Français erakundearekin lankidetzan ondu du proiekzioa FASek.
Filmak nazien kontzentrazio-esparruetan izandako preso judu nerabeak 1945ean Frantziara bueltatu zireneko sasoia jorratzen du. Hala, eta hainbat testigantzaren bitartez, nolakoa izen zen itzulera hori kontatuko dute protagonistek: lana aurkitzeko zailtasunak, amodiozko istorioak, errebisionismoa, memoria lana, eta deportatuen estatutuaren sorrera, besteak beste. Horretaz gainera, protagonista horien artxiboko irudiak ere tartekatuko dira.
