Abenduaren 18an eta 19an, muturreko eta abangoardiako proposamen esperimentalak biltzen dituen Zarata Fest jaialdiaren hamargarren edizioa egingo da Bilboko Hika Ateneoan, 18:00etaik 23:00etara.
Bi egun horietan makina bat musikari eta soinu-sortzaile arituko dira. Zerrenda oso luzea da, baina batzuk aipatzearren: Ainara Legardon, Aintzane Aranguena & Javier Corcobado, Billy Bao, Al Karpenter´S New Ensemble eta Taku Sugimoto Performed by Ferran Fages + Jon Mantxi + Ibon Rg + Hector Rey.
Antolatzaileen arabera, “Bertan (Zarata Fest jaialdian), desberdintasunak zarata aletzen du, ezin konta ahala kontakizun eta sentipenetan; eta, horiek erretilu berean botatakoan, badirudi bizitza labur oso bat bizi izan dugula gaua amaitzean. Performancea, ahotsa, elektronika, dantza, diskurtsoak eta bideoak”.
Informazio gehiago: xedh.org.