Lesakako Keinu Leihoak ekimenak antzerkia bilduko du berriz herri horretan, azaroaren 26tik abenduaren 15era arte, lau talderen ikuskizunen bidez. Egitarauak Gilkitxaro, Atx Teatroa, Dxusturi Teatroa taldeen piezak erakutsiko ditu, bai eta Mairu eta Led Silhouetteren arteko elkarlan bat ere.
Keinu Leihoak programa Gilkitxaro taldearen Identitarteak lanarekin abiatuko da. Identitarteak, Lutxo Egiak idatzitako antzezlana Gilkitxaro taldearen lan berria da, eta pieza horren bidez, 25 urte bete ostean, berriz haien buruari nor eta zer diren galdetu nahi diote.
Ane Zabala eta Galder Perez galdera berri eta zaharrekin jolasten jarraitzeko asmotan, Lutxo Egia idazlearen testua abiapuntu hartu eta Aitor García de Vicuña (Gartxito) musikariarekin antzezlana sortu dute.
“Izan ala ez izan, antzerkiaren galdera handietakoa izan, bada. Aritu ala ez aritu, hori ere bada teatroaren beharrezko jolasa. Antzerki lan honetan jokatzen duten pertsonaiak zerbait, norbait, izatera aritzen dira, solasean, jolasean. Etengabeko bilaketa den solasaren jolasean arituko dira, galduko dira eta aurkituko dira. Pertsonaiak ala ez pertsonak. Identitateak ala identitarteak. Identitate hitza aipatu gabe, terminoa eta terminoekin soka batean galtzeko moduko jolasa planteatzen dute Finn eta Seric protagonistek. Beti ere umorez, jolasa bestela ez baita jolas. Eta baita ironiaz beti ere, solasa bestela ez delako solas. Absurdua, ezta? Bai, izan bada, badelako. Hala ari delako.”
Datozen asteetan honako piezak izango dira ikusgai: Atx Teatroak Balbea egingo du (abenduak 3); Mairu eta Led Silhouetteren arteko elkarlana Lertxunaren hegada da (abenduak 9), eta Dxusturi Teatroak Lacoste egingo du (abenduak 15).
