Bihar hasita eta ekinaren 15era bitartean, Bernardo Atxagak idatzitako eta Tanttaka Teatroak eszenaraturiko El hijo del acordeonista/Soinujolearen semea lana, Bartzelonako Teatre Lliure antzokian ikusteko parada egongo da.
Fernando Bernuesek zuzendu, eta Patxo Telleriak egokitu du lana. Oholtza gainean Aitor Beltran, Joseba Apaolaza, Vito Rogado, Anke Moll, Iñaki Rikarte, Patxo Telleria, Mikel Losada, Asier Hernández, Amancay Gaztañaga, David Pinilla, Mireia Gabilondo eta Iñaki Salvador aktoreak ibiliko dira.
Tanttaka antzerki taldeak ikusgai bilakatu duen lana, honetan laburbil daiteke: “David eta Joseba umetako lagunak dira. Haurtzaroa atzean utzi orduko Davidek deskubritzen du aita nazionalen kolaboratzailea izan zela gerra zibilean. Francoren aurkako borrokaren aurkikuntzak liluraturik, batak arrazoi ideologikoengatik eta besteak arrazoi emozionalengatik biek erabakitzen dute 70eko hamarkadako ETA sortu berrian sartzea. Klandestinitateko borrokaldi labur bezain moldagaitz baten ostean Frantziara erbesteratu behar dute. Deserri hartan heltzen zaizkio Davidi desenkantua, abandonoa eta lagunak eta erakundea traditzea. Kartzelatik ateratakoan, bere kideek arbuiatua, David Ameriketara partitzen da bizi berri bat hastera. Handik hogeita hamar urtera, David Kaliforniako bere rantxoan hiltzeko puntuan dagoenean, horra non agertzen zaion etxera Joseba, iraganeko kontuak eskatzera. Soinulariaren semea behartuta dago orduan bere mamuei aurre egitera, haiengandik ihesi partitu zen Ameriketara baina”.
