Laster hastekoa den ZINEBI 63k euskal produkziorik berrienei txokoa eskainiko die beti egiten duen moduan Bertoko begiradak-Miradas Desde Euskadi atalean.
Azken lan horien berri izaten eta zabaltzen laguntzeko, jaialdiak “errealizadoreen kezka tematiko eta formalak islatzen dituen urteroko erakusketa honetan erakusten ditu.”
Betiko legez, hemendik urrun dauden gaiei buruzko begirada bereziak biltzen dira sail horretan, “jatorrizko begiradatik hasi eta euskal eremu historiko eta kulturalaren berezko alderdietaraino”.
Atal horretan aurkezten diren 10 film luze dokumentalak eta 20 film labur, Sail Ofiziala-Film Laburren Nazioarteko Lehiaketako 7 euskal filmekin batera, 2021ean tokiko zinematografiarako izan denaren laburpena dira. Hautatutako 20 film laburretatik, 13k Cineclub FASaren saria irabazteko aukera izango dute. Gainerako zazpiek lehiaketatik kanpo parte hartuko dute, Bilbao Aurrera 2020 eta 2021eko udal-planen ikus-entzunezko sustapenerako laguntzen irabazleak izan baitziren.
Hautatutako filmen artean honako hauek daude: Bost Minutu (Amaia Nerekan, 2021), ZINEBI Networking: Dokumentalen sorgunea ekimenaren 2019an ospatu zen bigarren edizioaren irabazle izan zen proiektutik sortutako dokumentala; Itziar Leemans zuzendari lapurtarraren bigarren film luzea den Boca Ciega; A School For All Of Us dokumentala (David Fernandez Graña, 2021) eta Fantasía Aitor Merino zuzendariaren bigarren filma; edo Bolante baten historia, Iñaki Alforja eta Iban Toledo zuzendariena.
