Book Trailerrak liburu bat ezagutarazteko egiten den bideo laburrak dira. Oso bide egokiak dira liburuak zabaltzeko eta irakurleak erakartzeko, izan ere filmetako trailerren antzeko teknikak erabiltzen dira eta Internet-en bidez hedatzen dira. Orokorrean gazteen arten irakurzaletasuna sustatzeko helburuz egiten dira horrelako ekimenak.
Bada horixe egingo dute Getxon. Bertan, 12-18 urte bitarteko Euskal Herriko edozein gaztek parte har dezake, eta egin beharreko lana honakoa da: aukeran ematen diren liburuetako bat irakurri, eta horren trailerra egitea.
Lanak apirilaren 14a baino lehen helarazi beharko dira bideoak Youtuben eskegi eta lotura e-mailez bidalita. Ondoren, maiatzaren 7an sari-banaketa egingo da eta bertan, euskara eta euskal kulturaren alorreko hiru kidek osatutako epaimahai batek irabazleak aukeratuko ditu.
Aurten bi kategoria egongo dira: A kategoria (16-18 urtera) eta B kategoria (12-15 urtera). Kategoria bakoitzeko Irabazleek tablet bana izango dute sari, bigarrenek eskola materiala erosteko 50 euro.
Oinarri guztiak, eta Book Trailerra egiteko jarraibide eta ideiak, www.kalabazan.com webgunean daude eskuragarri.