Uda honetan, Tabakalerak eskaintza zabala ondu du bisitarientzat, eta hiriko hainbat erakunde eta jaialdirekin (Chillida Leku Museoarekin, Dantz jaialdiarekin eta Donostiako Musika Hamabostaldiarekin) egitarau ederra osatu du. Gainera, abuztuaren 25era arte, María Jerezen Herri bat behar da mendi bat altxatzeko erakusketa interaktiboa egongo da zabalik.
Baina, Eduardo Chillidaren mendeurrenaren baitan antolatutako Topalekuak erakusketa nabarmendu behar da. “Artista donostiarraren obrari buruzko ikuspegi berriak aztertzen ditu, eta tokiko eta nazioarteko hainbat artistaren eta Eduardo Chillidaren beraren lanak hartzen ditu”. Erakusketaren inguruko beste jarduera batzuen artean, bisitak, solasaldiak, familientzako Kameleoiak gara! arte-lantegia eta Soinu objektua gazteentzako lantegia daude.
Beste aldetik, Tabakalerako Artisten Guneak JAI Jardun Artistikoentzako Institutuaren bosgarren edizioa martxan da, Gasteizko Artium Museoaren eta Oteiza Fundazio Museoaren laguntzarekin.
Lankidetzei begira, Tabakalerak nazioarteko hainbat jaialditan ere parte hartuko du. Donostiako Musika Hamabostaldiarekin lankidetzan, zentroak Tabakalera Dantzan ekimena hartuko du bere programazioan, dantza garaikideko proposamenekin. Eta hala, Dantz jaialdiak musika elektronikoa ekarriko du Sonhar saioarekin uztailaren 18an. Gainera, abuztuaren 3an eta 4an, Glad is the Day jaialdiaren zortzigarren edizioa egingo da Donostia Kulturarekin lankidetzan.
Eta zinea ez da faltako. Jazzinema eta Céline Sciamma zuzendari frantsesari eskainitako zikloak abian dira.
Medialab Tabakalerak lantegi-programa bat antolatzen du uda osoan zehar. SummerLab Labs lantegiek birziklapena, mugikortasun jasangarria, naturaren behaketa eta herritarren zientzia bezalako gaiak jorratuko dituzte.
Eta Tabakalerako ikus-entzunezko laborategiak Memoria lotsagabeak sortzaile audiobisualentzako lantegia hartuko du, “Euskadiko queer memoriari buruzko sorkuntza zinematografikoari eskainia. Euskadiko Filmategiko artxiboko materialaz baliatuko diren film laburrak garatuko dira bertan.”
