Gaur, hilak 9, Sopelako Charo Garaigortaren erakusketa inauguratuko dute Bilboko La Taller gunean. “Charo, artistaz gainera, Artiumeko Hezkuntza Saileko zuzendaria da”. Erakusketa zabalik ikusgai izango da abenduaren 23ra arte.
Garaigorta marrazkilari “fina” da, baina oraingoan, grabatu tekniketatik umilena aukeratu du bere lana burutzeko; hau da, fotokopia. “Fotokopiak marrazteko material gisa erabiliz, estudioko horma bat betetzen aritu da urte osoan, eta sormen prozesu hori nolabait La Taller-en erakutsi nahi dugu”, La Tallereko Maite Martínez de Arenaza kideak adierazi digu.
Artista bizkaitarren piezak aitzakia arkitektoniko batetik abiatu dira: erakusketak bi fase ditu, eta bi etapa horien jatorria Soviet Modernism/TheUnknowHistory izenburuko liburua da, argitalpen horretatik atera baititu jatorrizko irudiak, gero libreki tratatu dituenak. Hala, erakusketaren lehenengo fasea Sobietar Batasuneko eraikinetan ardazten da; bigarren fasea, berriz, liburuan agertzen den eta bi orrialde hartzen dituen irudi bakarraren inguruan egituratzen da: Tiblisi hirian dagoen Georgiako Bankuaren egoitza nagusiko eraikinaren terraza-zubia.
Garaigortaren hitzetan, “eraikinak ikusi nahi nituen, fusionatu eta elkarrekin harremanetan jarri, beren erabilera-programak dezepzionatu, nire urgentziarekin eta beren formekin erlaziona daitezen. Lan egitea haiek bukatu eta NI hasi arte”.
