Miroslav Slaboshpitsky zinegile ukrainarrak 2014an estreinatutako Plemya (The Tribe) filma pantailaratuko du gaur Bilboko FAS zineklubak, El Carmen aretoan, 19:45ean. FASeko kide Txus Retuertok aurkeztuko du emanaldia.
Miroslav Slaboshpitsky zinegileak zuzendu eta idatzitako pelikula gor-mutuen zeinu-hizkuntzan filmatuta dago. Ukrainarraren estreinako filma lan ausarta da, eta bere eskuetan, zeinu-hizkuntza biolentziarako elementu bihurtzen da. FASen arabera, gortasuna eta isiltasuna ez dira batere lasaiak, hain zuzen ere, ustezko lasaitasun horren aurkako osagaiak bihurtuko dira filmean.
Film gogorra da, latza eta artegagarria da, eta era berean, originala, hain justu, originaltasun horren ondorioz, hainbat sari jaso ditu, tartean, pelikula onenaren saria Cannes hiriko jaialdiko Aste Kritikoan, 2014an.
Filmak ondokoa kontatzen du: Nerabe gor-mutu bat barnetegi berezi batean sartuko dute. Bertan, biziraun nahi badu, erakunde basati bateko kide izan beharko du, “tribuko” kidea. Erakunde horrek mota guztietako delituak gauzatzen ditu. Nerabea, baina, erakundearen liderraren amoranteetako batekin maiteminduko da, eta istorioa amodioz eta amorruz beteko da.
