Urtero, udagoienean, Euskaltzaleen Topaguneak euskarazko kultur zirkuitua abiatzen du Bizkaian, Udagoieneko Ostera ekimenaren bidez. Aurtengo edizioa urriaren 21etik abenduaren 2ra luzatuko da, eta zuzeneko sei emanaldi ikusteko parada eskainiko da: lau kontzertu eta bi antzezlan.
Anarik zabalduko du Udagoieneko Ostera egitaraua larunbatean, Berrizen; azkoitiarrak Epilogoa diskoan oinarritutako emanaldia emango du.
Azaroan, lau hitzordu izango dira: 10ean, Larregi eta Hesian taldeko Zuriñe eta Fran arituko dira Igorren, formatu akustikoan; 19an, Kepa Junkera eta Sorginak-ek Maletak ikuskizuna eskainiko dute Bilboko BBK aretoan; 23an, Su Ta Gar Bilboko Kafe Antzokian izango da, eta 24an, Tartean antzerki-konpainiak euskal musikari buruzko Ez dok Hiru obra taularatuko du Arrigorriagan.
Azkenik, abenduaren 2an, Leioan, Miss Karaoke antzerki-lana aurkeztuko dute Metrokoadroka eta Pez Limbo taldeek. Miss Karaoke identitatearen inguruko lana da, umorea, absurdoa eta perfomance-a uztartzen dituena. Oier Guillanek idatzi du testua, DSS2016-ek sustatutako Dramaturgia berriak deialdiaren barruan, eta Gasteizko Principal Antzokiak ekoitzi du.
Informazio gehiago: topagunea.eus.