Gaur hasi eta azaroaren 19ra bitarte iraungo du Ikuska Pasaiako Badiako Nazioarteko Film Laburren Erakustaldiak. Emanaldiak Trintxerpeko Alkateordetzan egingo dira.
Gaur bertan, Telmo Esnal eta Asiera Altuna zinegileak omenduko dituzte. Horretarako sei film laburrekin ondutako emanaldia ikusteko parada izango da, 18:00etatik aurrera. Emanaldiaren ostean, solasaldia izango da, omendutako zinegileen partaidetzarekin.
Bihar, halaber inaugurazio ekitaldia egingo dute, 19:00etan. Horrekin batera, Emea eta anitza emanaldia izango da: “Emakumea hainbat arlotan islatzen duten film laburren proiekzioa”. Azkenik, Bekoz Beko saria emango dute. Gau partean, 22:30ean, Gauguasa, umorezko film laburren saioa izango da.
Etzi, Kalebegiak filma pantailaratuko da, 19:00etan. “Hamabi film labur, Donostia hiriaren hamabi erretratu. Gipuzkoako zinemagintzako izen historikoak eta hasi berriak nahasten dira Donostia 2016 Europako Kultur Hiriburua egitasmoak sustatutako film honetan”.
Gero, hilaren 14tik 19ra, lehiaketako film laburren emanaldiak izango dira, 20:00etan. Azken egun horretan, gainera, 19an, epaimahaiaren erabakia eta Ikuska 2016ko eta erakusleiho-lehiaketako sari-banaketa egingo dute.
Informazio gehiago: ikuska.info.
