Koldo Mitxelena Kulturuneak Mundua pitzatuta dago, baina hantxe gabiltza oinez antzezlanaren euskarazko hamar saio eskainiko ditu Donostiako Alde Zaharreko Santa Teresa Komentuko egoitzan. Harkaitz Canok idatzi eta Tanttaka antzerki taldeak ekoitzitako lana da, Fernando Bernuésen zuzendaritzapean, eta gaztetxoen artean irakurtzeko zaletasuna areagotzea du helburu. Saio irekiak datorren larunbatean, abenduak 16, izango dira, 10:00etan eta 12:00etan beste emanaldi batekin, eta 50 laguneko edukiera bakoitzarentzat. Gainera, beste zortzi saio eskainiko zaizkie Kultura Eskola programan parte hartzen duten institutuei. Saio hauek zozketa bidez erabaki dira ikastetxeek egindako eskaeren artean.
Mundua pitzatuta dago, baina hantxe gabiltza oinez 9 eta 12 urte bitarteko haurrei zuzenduta dago eta bere historia gurasoen eta seme-alaben artean zabaltzen den bizi eta emozio arrakala batetik abiatzen da. Harkaitz Canok idatzitako album ilustratu honek liburutegiei eta literaturari omenaldia egin nahi die, gazteak literaturaren mundura erakartzeko asmoz. Antzezlana liburu-aurkezpen baten aitzakian hasiko da, eta liburu aurkezpen horretan aurkezten den liburua izango da ipuin hau, benetan existituko dena. Alabarekin nola komunikatu ez dakien aita batek paperezko hegazkin bat bidaltzen dio egunero balkoitik agur esateko. Hegazkinetan idatzitako mezuen bidez, aitak literatura-misioak jartzen dizkio alabari, liburuzain zorrotz baten konplizitatearekin argitu ditzan. Horrela, liburuen eta bizitzaren arteko lotura ezagutuko du neskatoak. Urte asko geroago, orain idazlea den alaba, liburutegira itzuliko da bere lehenengo liburuan jaso duen iniziazio-esperientzia hori kontatzeko.
Liburua argitaratzeaz gain, obra lau hizkuntzatan estreinatuko da: valentzieraz, galizieraz, euskaraz eta gaztelaniaz, antzerki konpainia ezberdinen eskutik.
