Idoia Beratarbideren Memoria Zulatua pintura erakusketa ikusgai dago Errenteriako Xenpelar aretoan uztailaren 9ra bitartean. Asier Sarasolak eta Ander Fernandezek, gainera, olerkiak idatzi dituzte bere erakusketako irudietan inspiraturik eta aretoan bertan irakurri ahal dira, -pintorearen testuak ere jasotzen dira-.
Egilearen hitzetan, “norberaren memoria aurreko belaunaldien memoriarekin osatzen da, horregatik memoria zulatua da beti gurea. Aurreko belaunaldien aztarnak, oihartzunak, bizipenen markak arakatu ditut orainaren begiekin, pertsona bakoitzaren unean uneko bizipenetan eta sortzen ditugun esperientzia berrien zergatietan gure aurrekoen bizipenek izan dezaketen itzala bilatuz”.
Behean albiste honekin argitaratu dugun dion irudiari dagokion Asier Sarasolaren olerkia irakurri daiteke.
Zulo arteko printzez eginak gara
hustasunari ebatsi ahal izan dizkiogun
iragan haragiztatuen taupada haziez.
Idatziz jasota jaio ohi gara duela zenbait mende
hari mendrez sostengatuta eta
zuhaitz izan ginena oroituko duten garaien bidean.
Bata bestearen begietara noiz etorriko
zatika osa daitekeen esperoa da gurea
ortzaizera begirako beiratea
sortzera egin duen mantala.
Josi ditzakegun urratuen historia da gurea
ilaje basa
amaraun beltz
handitzera eta sendotzera egingo duten itzalena.
Arnasa ematen diguten itzalak
itzala ematen diguten birikak
besteon goiza ernaltzera egin zutenak
gordeta gauzkatenak beren isilean.
Guk ere gorde gura ditugu
ibiltzen dugun bizitzaren oihartzunei lot gaitzaten
gaurkoa bailitzan behin betiko inauteria bakarra.
Irudi eta olerki gehiago hemen.