Donostiako Kresala Zineklubak hiru saio prestatu ditu azarorako, oso film interesgarri eta bereziak ikusteko abagunea eskaintzeko, bertako Truebako pantaila handian.
Gaur, hilak 12, izango da lehen saioa Woody Allen zuzendari bikainaren lan batekin: Otra Mujer (1988). Marion Post filosofiako irakasle bikainak eszedentzia eskatu du liburu bat idazteko. Egun batean, lan egiteko estudiotik alboko kontsulta bateko psikoanalisi-saioak entzun ditzakeela jakingo du. Pazienteetako baten aitorpen hunkigarriek bere bizitza sakon aztertzera bultzatuko dute. Ordutik aurrera dena hutsik iruditzen zaio, eta autoengainuan eta emozioen beldurrean oinarrituko da.
Azaroaren 19an, Antes era divertido (2023) izeneko lana proiektatuko da. “Sam Cowell stand-up komediante eta umezain izateko hautagai gaztea da. Trauma osteko estresaren nahasmenduarekin borrokatzen da, eta Brooke nerabe desagertuaren bilaketarekin bat egin edo ez erabakiko du”.
Azkenik, azaroaren 26an, Rehana (2021) filma pantailaratuko dute. “Rehanak, Dhakako (Bangladesh) ospitale bateko irakasle laguntzaileak, ama alargun baten eguneroko zailtasunei aurre egin behar die, eta familiaren eta lanaren arteko oreka aurkitzeko borroka egin behar du. Arratsalde batean, bere ikasle bat irakasle baten bulegotik negarrez irteten ikusten du. Rehana ahal duen guztia saiatuko da abusu hori fakultatean aitor dadin. Rehanak uko egiten dio gizarte patriarkalaren arauak onartzeari, eta guztia jokoan jarriko du bere ikaslearekin eta alabarekin justizia egin dadin”.
