Arabako Bertsolari Txapelketaren hamahirugarren edizioa da 2017ko hau, joan den larunbatean aurkeztu zena. Txapelketa lehenengo aldiz 1984an antolatu zen, eta handik hona makina bat hitzordu, saio eta txapeldun pasatu dira ekitalditik.
Txapelketan, Arabako 18 bertsolarik parte hartuko dute, 2015eko Arabako Bertsolari Txapelketaren finalean kantatu eta izena eman duten 5 finalistek gehi 2016an jokatu diren kanporaketan sailkatu diren 13ek.
Lehen itzulian 18 bertsolariak 3 saiotan banatuko dira. Oreka lortzeko asmoz, 2015eko txapelketa eta 2016an jokatutako kanporaketa fasearen arabera osatu dira saioak, eta lehen saioa, otsailaren 5ean izango da Langraizeko Gizarte etxean. Zigoitian eta Dulantzin izango dira hurrengoak. Finalaurrekoan Legutio, Laudio eta Aramaion izango dira, eta finala, Gasteizen. Saioen gaineko informazioa hemen duzue.
Gaur egun, herrialde osoan lantzen da bertsolaritza ikastetxez ikastetxe, hainbat herritan bertso-eskolak daude, eta bertsolaritzaren lanketa, sustapena eta transmisioa eskualde guztietara zabaldu da. 2017an 35 urte beteko dira Arabako lehenengo bertso-eskolak martxan ipini zirela. Gasteizen eta Aiaraldean izan ziren aitzindariak. Aiaraldeko bertso-eskolak Laudioko Areta Tunel tabernan eman zituen bere lehenengo urratsak, 1982an.
