Irudika ilustrazioaren nazioarteko topaketa profesionalak 2020 eta 2021 urteetako egotaldi artistikoetan egindako lana biltzen duen erakusketa abiatu du. Erakusketa maiatzaren 2ra arte egongo da ikusgai Gasteizeko Vital Fundazioaren Erakusketa Zentroan.
Miguel Ramal artista alacantarra eta Sabrina Perez ilustratzaile uruguaitarra izan dira protagonistak, Irudikaren 2021eko irudia elkarrekin sortzeko. Miguelek eta Sabrinak telematikoki egin dute lan elkarrekin, eta esperientzia hori ere jasotzen da erakusketan. Artisten hitzetan: “ezin genion aurre egin Murgilketen esperientziari enkargu independenteei aurre egiteko dugun moduan. Prozesuaren alde egin genuen, alde bien arteko bitartekari gisa, bai tresna metodologiko gisa, bai elkarrizketarako tresna gisa. Horrela, gure hitzaldiek bi norabide hartu zituzten, non hitza erabiltzen den eta marrazkia elkarrizketarako bide bihurtzen den.”
Irudikaren webguneak bi artisten elkarlanean emandako bost asteen egunerokoa du jasota. Sabrina Perez, Montevideo.Ehungintza-diseinatzaile graduatu eta urtebetera, animazioa eta ilustrazioa ikasteari ekin zion hainbat tailerretan, eta arte-laguntzaile egin zuen lan animazio-proiektuetan. 2017an, Uruguaiko Hezkuntza eta Zientzia Ministerioak antolatutako Haur Literaturako Ilustrazioko IV. Sari Nazionalaren hirugarren saria irabazi zuen.
Miguel Ramal diseinu grafikoan graduatua da, eta bere lana ilustrazioaren eta diseinuaren artean dago. Erakusketei dagokienez, Italian, Portugalen, Argentinan eta Espainian erakutsi ditu bere lanak.
Irudika Murgilketak 2021 egotaldi artistiko birtualen programa Vital Fundazioaren, AC/E Espainiako Kultura Ekintzaren eta Uruguaiko Kultura Ministerioaren Ikusizko Arteen Institutu Nazionalaren laguntzari esker egin ahal izan da.
