Joxemari Iturralderen zuzendaritzapean antolatu da Bilboko Foru Liburutegian Anima zaitez idazten hastera izeneko ikastaroa. Urriaren 15etik abenduaren 17ra arte luzatuko da, eta izena emateko epea urriaren 1tik 11ra izango da.
“Literaturaren mundura hasiko gara inguratzen. Saioek alde teorikoa izango dute (gutxi), eta alde praktikoa (askoz gehiago). Ikasleak bere lehen testu literarioak, bere lehen istorioak, hasiko dira idazten, modu sinple eta erosoan. Berdin dio lehendik ez badute ezer idatzi, berdin dio orain arte literaturaren mundutik oso urrun egon badira ere. Ikastaro hauek ondo pasatzeko, literaturaz gozatzeko daude pentsatuta. Denok izaten ditugu hainbeste ideia buruan, orain hasiko gara gure ideia / asmo horiek literarioki idazten, beldurrik gabe.”
Ikastaro honetako partaideak literaturaren munduan murgilduko dira. Saioetan testuen balio literarioa antzematen arituko da, eta baita literatur lanak gauzatzeko trebeziak garatzen ere.
Toki berean, irailaren 30etik abenduaren 16ra arte, eta Yurre Ugarteren zuzendaritzapean, Zuk zeuk idatzi (sormenezko idazketa) izeneko ikastaroa ere egingo da. Kasu horretan, izena emateko epea irailaren 16tik 27ra arte izango da.
Jarduera honetan testuetako zuzentasun gramatikaletik harago heltzen ahaleginduko da, teknika narratiboak ulertzen eta barneratzeko asmoz. Hortaz, modu sortzailean izkiriatzen jardungo da, idazkuntzan gutxieneko trebetasunik eskuratzeko.
Aipaturiko ikastaroen gaineko informazio guztia hemen topatuko duzue.
