Duela bi egun 100 urte bete ziren Salvador Espriu jaio zela (1913ko uztailaren 10ean). Aritz Galarragak Salvador Espriuren sei poema berezi euskaratu ditu eta armiarma.com gunean argitaratu ditu. Pais Basc saileko sei poema dira, Espriuk 1965 eta 1970 bitartean idatzitakoak ( Ilargi, Karlos Noblearen hilobia, Haizea, Bihar, Gau eta Abesti bihoztun bat entzun nahiz).
Salvador Espriurekin Juan San Martinek izan zuen gutunketa labur batean honela idatzi zion Espriuk: “Enekien ezer zure asmo eta egintzei buruz, eta egiazki eskertzen dut; euskararen goreslea naiz eta Euskal Herria eta bere jendearen zale gartsua. Beraz, pozik ematen dut itzulpena argitaratzeko eskubidea, ohore bereziz atsegintzen bainau”.
Bestalde, Salvador Espriuren obra hauek ere euskaraturik irakur ditzakezu Euskarari Ekarriak gunean: Sinerako liburua (1966an Juan San Martinek itzulia Egan aldizkarian); Zezen Larrua (1967an Juan San Martinek itzulia Egna aldizkarian), 20 poema (Koldo Izagirrek 1988an itzuliak) ; 10 poema (Gerardo Markuletak 1997an itzuliak).
