Errenteria Hiria Kulturgunean, bihar, martxoak 28, arratsaldeko 18:00etan, Galder Perezek idatziriko eta Grimm anaien ipuin klasikoa den Hansel eta Gretel Txokolatezko Etxean ikuskizuna taularatuko dute Glu-Glu producciones taldeak, etxeko txikienentzat.
Istorioa ezagutzen duzue, ezta? Hansel eta Gretel familia txiro bateko neba-arrebak dira. Gretelek aitari zera entzungo dio, seme-alabak basoan abandonatuko dituela. Biharamunean, aitarekin batera basoan barrenean doazela, bidean harriak utziko dituzte etxerako buelta zein den jakiteko intentzioz. Baina harriak hartz zintzo bati emango dizkiote, animalia gaixoak ehiztariez defendatzeko behar baititu. Orduan, ogi-papurrak bidean jartzen hasiko dira. Baina honek ez du ezertarako balio, izan ere ogi-papurrak txoriek jango baitituzte. Iluntzen denerako Hansel eta Gretel baso barrenean galduta egongo dira. Ipurtargia ezagutuko dute orduan, haien bihotzak eta ametsak argituko dituen izaki magikoa. Goizeko eguzkia agertzearekin batera txokolatezko etxea aurkituko dute. Pozez zoratzen jateari ekingo diote han bizi den emakume atsegin baten baimenaz. Baina atsegina zirudien hori, sorgin maltzurra da. Haurrak giltzapetuko ditu, lodiago daudenean jateko intentzioz. Ausardiaz eta argitasunaz baliatuta Hansel eta Gretelek ihes egin eta aitarekin basoan elkartzea lortuko dute.
Egokitzapen honek ohiko narrazioarekin bat egiteaz gain, gaur eguneko osagai eszenikoak eta musikalak eranzten dizkio familia osoarentzako antzezlanari.
