Euskarazko antzerkia hauspotzeko eta antzerkilariei plaza berriak eskaintzeko xedea duen Lautan Hiru festibal handia otsailaren lau ostegunetan egingo da (otsailaren 2an, 9an, 16an eta 23an), eta guztira 9 ekitaldi eskainiko dira: sei antzezpen, solasaldi taularatu bat, irakurraldi dramatizatu bat eta Ganbila bildumaren aurkezpena.
Antolatzaileak adierazi dutenez, “aurten, gogoberrituta eta nobedadez jantzita dator bosgarren aldia beteko duen Lautan Hiru antzerki-jaialdia. Antzerkigintza ardatz hartuta, hainbat emankizun eskainiko dira: Lautan Hiruk ekoitzitako saio esperimental bat (solasaldi taularatua) eta bakarrizketa bat (Patxo Telleriaren eskutik), Ganbila bildumaren aurkezpena… Helburuak, baina, ez dira aldatu: euskarazko antzerkia hauspotu nahi da (antzezlan guztiak euskaraz emango dira); antzezlanak erakusteko gune berriak eskaini nahi zaizkie sortzaileei; eta Bilboko Zazpikaleetako giroan eragin nahi da, kultura aukerak zabalduta”.
Goian aipaturiko ekoizpen berri horiek honako hauek dira: Dramaren komeriak deseraikitzen (solasaldi taularatua), Matxalen de Pedrok gidatuko du esperientzia berria. Bertan, Aizpea Goenaga, Jokin Oregi eta Eneritz Artetxe ahaleginduko dira antzerkigintzaren gakoak azaltzen, modu umoretsu eta jostarian. Eta Txizatoki bat eszenatokian, Patxo Telleriak jaialdirako beren-berengi idatzitako gidoia. Telleriak berak antzeztuko du, jaialdiaren estreinako egunean.
Bilboko Udalak babesten du jaialdia, eta Euskaltzaindiak aurten ere elkarlanean antolatu du egitaraua, hain zuzen, Cafe Bar Bilbaorekin eta BIRA Kulturgunearekin batera. Eszenatokiei dagokionez, ohikoei AEKren Kalderapeko kulturgunea gehitu zaie edizio honetan. Hortaz, bost lekutan programatuko dira lanak: Kalderapeko, BIRA, Cafe Bar Bilbao, 7Katu gaztetxea eta Euskaltzaindiaren egoitza.
2020an, Euskaltzaindiak antzerki-ekoizpena sustatzeko laguntza berria sortu zuen, Bilboko Udalaren babesarekin. Estreinako laguntza hori Artekartu konpainiak eskuratu zuen, Hauts artean lanagatik. 2021ean, berriz, Les Bobe Bobe konpainiak jaso zuen laguntza, Udaberria heldu da lanagatik. 2022koa eman barik gelditu da, baina aurten beste deialdi bat egingo da, 2024ko edizioari begira.
Programazio guztia hemen kontsultatu ahal duzue.
