Amorantek (Iban Urizar Ondarza) kontzertua emango du bere jaioterrian, Elgoibarren hain zuzen, bihar, Herriko Antzokian, 20:30etik aurrera. Musikariarentzat emanaldi berezia izango da: “Norberaren herrian jotzeak suposatzen duena kontutan edukita, gogotsu eta urduri nago”.
Kontzertu horretan, gainera, laster argitaratuko duen binilozko singlean jasoko diren kantuak entzun ahalko dira. Bi abestiok hauexek izango dira: rumba oihartzunak haizatzen dituen Brueghel zarra eta Joxe Mari Iparragirreren Manuela kantuaren bertsioa.
Amorantek, halaber, otsailean egingo dituen emanaldien datak ere iragarri ditu: 1ean, Leioako Kultur Maratila egitarauaren baitan; 9an, Arrasateko gaztetxean; 17an, Gernikako Trinkete Antitxokoan, Alvaro Barriusorekin batera; eta, azkenik, 19an, Zaragozan, Anarirekin.
Amorantek, iaz, bost kantuko lehen lana ondu zuen, “soinu-postal” formatuan. Formatu berezi horretan bost postal bildu zituen, eta postal bakoitzak kantu bat deskargatzeko kodea zuen. Oraingoan, berriz, biniloaren aldeko hautua egin du, baina orain ere iraupen laburreko grabazioa lehenetsiz.