Arantxa Aguirreren Ciento volando dokumentala urtarrilaren 10ean iritsiko da zinema-aretoetara. Dokumentala A Contracorriente Films eta Bixagu Entertainment-ek ekoitzi dute, eta Chillida Leku museoa bisitatzeko, sentitzeko eta bizitzeko esperientzia ikus-entzunezko hizkuntzara eramateko erronka hartu du bere gain.
XX. mendeko artista unibertsal eta eraginkorrenetako bat den Eduardo Chillida eskultore donostiarraren mendeurrenarekin bat eginez, Arantxa Aguirrek zuzendutako Ciento volando dokumentala estreinatuko du A Contracorriente Films-ek urtarrilaren 10ean. Dokumentalaren estreinaldiarekin artistaren mendeurrenaren inguruko ospakizunen amaiera izango da.
“Eduardo Chillida artista handia izan zen, arte garaikidean aztarna ezabaezina utzi zuena. Bizitza osoa eman zuen materia lantzen, zizelkatzen eta modelatzen, espazioarekin, denborarekin, materiarekin edo espirituarekin zerikusia zuten funtsezko gaiak ebazteko. Giza eskubideen eta justizia sozialaren defendatzailea ere izan zen.”
Filmean Jone Laspiur Goya saria irabazi duen aktorea, Joaquín Montero arkitektoa, Fernando Mikelarena artista, Koldobika Jauregi eskultorea (duela gutxi hil zena eta dokumentala omentzen duena), Andrés Nagel, Mireia Massagué Chillida Lekuko zuzendaria, Miguel Zugaza Bilboko Arte Ederren Museoko zuzendaria, Ixiar Iturzaeta, Jexuxmari Ormaetxea, Nausica Sanchez, Kosme de Barañano, Iñigo Irureta eta Elena Cajaraville agertzen dira.
Chillida Leku, Eduardo Chillidak pentsatu eta, bere emazte Pilar Belzuncerekin, modelatu zuen espazioa, pasabide gisa sortu zen, non lan bakoitza finkatu, egiten amaitu eta munduan bere lekua aurkitu ahal izan zuen. Denboraren poderioz, Chillidak betierekotasunerako utzitako ondarea bizitzeko espirituarekin eta formarekin estuki lotzen den tokia izatera igaro da, eta museo bat baino askoz gehiago da.
