Altraste Dantza taldeak Mientras llueva aurkeztuko du Amurrioko Antzokian, Dantzaren XVII. Zirkuitua ekimenaren barruan. Zuriñe Benaventek eta Ignacio Monterrubiok osatutako konpainiaren koreografia Arabako herri horretan izango da apirilaren 17an, larunbatean.
Musika, dantza, testua eta bideo-proiekzioak barne hartzen dituen eta publikoarekiko gertu dagoen pieza intimo horretan, Zuriñe Benaventek eta Ignacio Monterrubiok iraganaren eta orainaren arteko bidaia batean murgilduko gaituzte, ebatzi gabeko ametsen eta konpontzeko dauden ametsen artean. Bidaia horretan etengabe egiten zaie erreferentzia Mariana Pineda, Martin Luther King, Federico García Lorca edo Manuel de Falla gisako figura unibertsalei. Era berean, erreferentzia pertsonalak eta intimoak egiten dira, publikoari pieza lehen pertsonan bizitzeko aukera emanez, eta bertan gertatzen ari denarekiko konplizitate handia mantenduz.
Beste aldetik, eta Dantzaren XVII. Zirkuitua ekimenaren barruan ere, beste bi hitzordu programatu dira: Proyecto Larruak Ojo de buey egingo du Kultur Leioan, gaur berton, apirilak 16, 19:00etan hasita, eta InPut taldeak Nosotros pieza oholtzaratuko du igandean, Getxoko Muxikebarrin.
