Gaztezulo aldizkariak Ika-mizka. Eta hik? Nola bizi dunk euskara? izeneko egitasmoa abiatu du euskara gazteen artean sustatzeko xedearekin.
Euskararen Nazioarteko Egunaren harira, euskaldunok gure hizkuntzari dagokionez bizi ditugun kezkak azalaraztea du helburu nagusi ekimen honek: “pozak, oztopoak, aurrerapausoak, aurpegi txarrak, aldaketak, anektodak…. Euskaraterapia moduko zerbait, azken batean”.
Hala, hil honetan, gai honen inguruko eztabaida bideoak sareratuko ditu Gaztezulok hainbat esparrutako aurpegi ezagun euskaldunen partaidetzarekin. Honatx kirolari ezagunen hitzekin onduriko bideoa.
Halaber, abenduaren 3an, UPV/EHUren Gipuzkoako Campuseko Carlos Santamaria Zentroan ekitaldi berezia egingo da. Aipaturiko euskaldun famatu horiek, eta bertan parte hartzeko izena emango duten gainerako gazteek, Jon Artanok dinamizatuko duen mahai-inguruan bilduko dira. “Iritziak, esperientziak eta beste truka ditzaten, eta posible bada, ondorioak, aterabideak eta konpromisoak ere adostu ditzaten”.
Eztabaida saio horren ostean, Zuloak taldeak joko du.
