Bilboko Udalak sustatzen duen Bilbao Blues Festival jaialdiaren hirugarren edizioa ostegun honetan, uztailaren 25ean, hasi eta igandera bitartean luzatuko da.
Udako musika hitzordu garrantzitsuenetako bat da Bilbon antolatzen den hori, eta betiko legez, estatuko eta nazioarteko makina bat artista handik parte hartuko dute.
Eta horren adibide, Areatzan burutuko diren kontzertuetako protagonistak dituzue: The Fabulous Thunderbirds, D.K. Harrell, Ana Popovic, Martha High & The Soul Cookers, Anson Funderburgh, Mike Morgan, Shawn Pittman, Southern Avenue, Annika Chambers, Terrie Odabi, Chino Swingslide Trio, La Perra Blanco, Kid Carlos Band edota Ibai García Blues.
Lehenengo egunean, kontzertu berezia izango da, izan ere, Volotea Blues Challenge txapelketako finala izango da. Del Toro Blues band, Sirjo Cocchi & Balta Bordoy-The Blues Way, Tòfol Martínez Blues band eta The Lazy Tones arituko dira Volotea Blues Challenge 2025 jaialdian Estatuko ordezkari izateko lehian, eta hortik aterako da Spliten (Kroazia) egingo den European Blues Challenge 2025 jaialdira joango den taldea. Bakoitzak 30 minutuko emanaldia eskainiko du, 19:30etik aurrera, Areatzako kioskoan.
Jaialdiak ere bere sari propioa banatuko du, eta aurten, Kim Wilson musikariari emango zaio Bilbao Blues Jaialdiaren Saria. The Fabulous Thunderbirds eta D.K. Harrell, 26 urte baino ez dituen jenioa, Bilbao Blues Festival jaialdiaren hirugarren edizioko emanaldi nabarmenetako bi izango dira. Gainera, Harrell-ek lehen aldiz joko du hemen. T-Birds taldeko liderrak, Kim Wilson harmonizista ospetsuak, aurtengo Bilbao Blues Festival Saria jasoko du bere musika ibilbide sendo eta distiratsuagatik.
Beste jardueren artean, Boogie-Woogie klaseak antolatu dira, igandean, hilak 28, 11:00etan. Edonork parte hartu ahal du, eskolak dibertigarriak eta dinamikoak dira. “Swing-arekin mugimenduak partekatzen dituen boogie woogie saioek jende ugari erakarri zuten aurreko edizioetan”.
Jaialdiaren programazio osoa eta taldeei buruzko informazioa guztia jaialdiaren webgune ofizialean daude.
