Arriaga Antzokiak Japoniako eta Euskal Herriko kulturak uztartzen dituen Hybrid, Rhythm & Dance ikuskizuna eskainiko du asteazkenean, hilak 26, 20:00etatik aurrera. Joan den martxoan, Tokioko New National Theatreko Playhouse aretoan izan zen estreinaldia, eta kritikak oso onak izan ziren. Orain Bilbora heldu da.
Hybrid, Rhythm & Dance ikuskizuna Tokioko New National Theatreko Motoko Hirayama koreografoak zuzendu du, eta obra aurrera ateratzeko, Oreka TX taldea eta Emi Toko Ainu etniako abeslaria gehitu ditu.
Arriaga Antzokiaren arabera, “kulturen arteko nahasketa zirraragarria eta bisualki oso ederra da emaitza. Ikuskizunak kultura japoniarra, euskalduna eta Ainu etniarena uztartzen ditu, azken honetakoa baita Emi Toko, kantatzeko oso era berezia duena”.
Koreografoaren Hybriden ideia Euskal Herrira eta Ainuen herrietara egindako bidaietan oinarritzen da, izan ere, bidaia horietan Oreka TX-ren musika eta Emi Tokoren kantaera ezagutu zituen. Euren arteko harremana sakonduz joan zen bideoak, musika eta abestiak partekatuz, eta ondoren Ikuskizuna borobildu zuten, “Oreka TX Japoniara bidaiatu eta guztiek elkarrekin egindako hilabeteko egonaldiari esker”.
Ikuskizunaren bira Txalap.ARTen eta New National Theatreren arteko koprodukzioa da. Gainera, inguruko kultura programatzaileekin kolaborazioak lortzeko xedea duen DSS2016ko Elkarrizketak delako lerroaren barruan dago, eta EU-Japan Fest erakundearen babesa ere badu, Japoniaren eta Europaren arteko elkar ezagutza sustatzen dituzten kultur emanaldiak sustatzen dituena.
