Karlos Martinezek eta Rebecca Collinsek proposatutako saioa da The juniper tree filmaren proiekzioa (Nietzchka Keene, 1990), Bulegoa z/b plataformak, etzi, azaroak 27, 20:00etan antolatu duena. Emanaldiaren ondoren, solasaldia izango da.
Nietzchka Keenek zuzendari gisa egindako debut bitxi honetan, Grimm anaien Ipurua istorio makabroaz duen ikuspegia eskaintzen du. Film horretan, Islandiako paisaien edertasun enigmatikoaren baitan, Björk kantari famatua, gazte denboran agertzen da. Pelikularen sinopsia honakoa duzue: “Erdi Aroaren amaieran, Margit gaztea (Björk abeslariak interpretatua) eta haren ahizpa zaharrena, Katla, ihesi doaz mendira, amari su eman zaionean sorginkeriaz akusatuta. Biek aurkituko dute babesa Jóhannengan: nekazari alargun bat, bere seme txikienarekin, Jónasekin bizi dena. Jóhann seduzitzen saiatzen ari da Katla; Margit eta Jónas, berriz, lagun onak egin dira. Baina mutikoa konbentzituta dago sorgin bat dela Katla eta biziki gorroto dio. Bere aldetik, Margitek bere ama zenduaren ikuskariak ditu eta irudimenezko mundu batean babesten da…”
Aipaturiko bi adituak, Karlosek eta Rebeccak, Azalan (Lasierra, Araba) dagoen P.I.C.A (sormen artistikoko prozesuetako Irudikapen Kolektiboko Programa) programako parte-hartzaile gisa ari dira, eta urtebete daramate naturari/naturei buruz hitz egiten, proiektu partekatuen eta beste erreferentzia-puntu batzuen bidez, kultura bisualari eta basatasunari buruzko galderak nahastuz. Rebecca Collins (High Wycombe, 1982) artista eta ikertzailea da, eta modu praktikoan eta teorikoan arakatzen ditu soinu-artea eta arte eszenikoak. Eta Karlos Martinez (Durango, 1982) artista da, eta bere lana gai ontologikoetan ardazten da, sarbideari eta doluari lotutako arazoetan sakontzeko.
