Gaur goizean Durangoko Azokan egin den ekitaldian Jon Irazabal ekimenaren zuzendariak krisia aipatu du bere agerraldia hasi bezain pronto. Hala, adierazi du aurtengoa ez dela Gerediaga Elkartearen ametsetako azoka, izan dituzten bitartekoekin gauzaturiko azoka baizik. Izan ere, krisia dela eta %30 murriztu zaie aurrekontua, -aurtengo aurrekontua milioi erdikoa izan da-, eta hori dela, "beste urte batzuetan baino ekitaldi gutxiago izango dira". Murrizketa horrek, gainera, eragin izan du azpiegituretan ere. Hala, Haur Literaturako txokoa Elkartegia eraikinean izango, ohikoa den karpa kendu egin behar izan baitute. Hala ere, azoka "duina" egiten saiatu dira krisia ahalik eta gutxien igarteko, "egoera horren aurrean gure erantzuna auzolana izan da".
Aurtengo azokaren gai nagusia erotismoa izango da, eta Argizaiola saria Imanol Urbieta musikariari emango diote. Herrialde gonbidatua berriz, Kurdistan izango da.
Bestalde, Ahotsenea Sortzaileen Gunea urtero ahalegin berria egiten ari da bisitarien artean aurreko bi urteetan izan duen harrera onari ahalik eta erantzun egokiena emateko. Horrela, aurten lau egunez izango da zabalik, abenduaren 5etik 8ra bitartean hain zuzen. Egunero zabalik egongo da goizeko 10:30etik 20:00ak bitartean eta ordu erdiro solasaldi, aurkezpen eta emanaldiak izango dira idazle eta musikariekin, beti ere, sortzaile euskaldunek haien sormen-lanak erakusteko tokia izan eta lan horien hartzaileekin harreman estuagoa izan dezaten. Orotara, 76 ekitaldi izango dira, aurkezpen, solasaldi, errezitaldi eta kontzertu, tartean, eta gutxi batzuk aipatzearren, Gose, Ken 7, Mursego, Irati Jimenez, Miren Agur Meabe, Jon Benito, Pirritx, Porrotx, eta Marimotots, edo Bonberenea diskoetxeak aurten argitaratu dituen nobedadeekin.
Nontzeberri
