Bilboko Udalak antolatutako Bilboko Dokumentalen eta Film Laburren Nazioarteko Jaialdiaren, Zinebiren 62. edizioaren nondik norakoak aurkeztu ditu.
Ohi den bezala, jaialdiak hainbat sail nagusi izango ditu: Nazioarteko Lehiaketaren Sekzio Ofiziala, zuzendari berrien lanari eskainita dago eta bi lehiaketatan banatuta dago: Film Laburren Nazioarteko Lehiaketa eta ZIFF-Zinebi First Film Nazioarteko Lehiaketa; Beautiful Docs, dokumentalaren nazioarteko panorama eskaintzeko; eta Bertoko Begiradak-Miradas Desde Euskadi, Euskal Herriko ikus-entzunezkoei eskainitako sekzioa.
Zinebik Ohorezko Mikeldi saria ere banatuko du aurten, zine garaikidean diharduten emakume eta gizon garrantzitsuen ibilbide eta dimentsio artistikoa saritzeko. Aurten, batetik, Jean-Pierre eta Luc Dardenne belgikarrei emango zaie saria (Canneseko Jaialdian Urrezko Palma bi lortu dituzte). Eta bestetik, Bizkaiko zinearen aitzindari izan diren bi emakumeren lana ere aitortuko da: Ana Murugarren zuzendari, gidoigile eta muntatzailearen lana batetik, eta Maria Eugenia Salaverri idazle, gidoigile eta ekoizlearena bestetik.
Aurtengo edizioan 101 herrialdetatik ekarritako 3.525 film labur aurkeztu dira; horietatik, 30 herrialdetako 60 aukeratu ditu Sail Ofizialean parte hartzeko.
Zinebi jaialdia azaroaren 13an hasiko da Arriaga Antzokian, eta hilaren 20ra arte luzatuko da aurten.
