Kimuak proiektuan aurkeztutako 63 proposamenen artetik, zazpi aukeratu dira zigilu horrekin aurten banatzeko.
Hortaz, aurtengo Kimuak katalogoa honako film laburrek osatzen dute: Aitor Gutiérrezen Anómalo; Lander Camareroren A Serious Comedy; Kote Camachoren Don Miguel; Koldo Almandozen Hubert Le Blon-en azken hegaldia; Artelekun ekoiztutako Sailor’s Grave proiektu kolektiboa; Asier Altunaren Soroa; eta Aitor Arregiren Zarautzen erosi zuen. Euskarazko bi lan, gaztelerazko bi eta dialogorik ez daukaten beste bi daude.
Aitor Gutierrezen lana suspensearen gaineko broma bat da; Lander Camareroren A Serious Comedy Iraken filmatuta dago, arabieraz, eta hau da herrialde hartan hogeita hamar urtean egin den lehen komedia; Altunaren Soroa Jorge Oteizaren Hildako bakoitzak hatz salatzaile bat uzten du zerurantz olerkian oinarrituta dago; Kote Camachok zuzendu duen Don Miguel krisiaren eta finantza sistemaren gaineko satira da; Koldo Almandozen Hubert Le Blon-en azken hegaldia film biografikoa da; eta Aitor Arregiren lanean, Zarautzen erosi zuen, jasandako kalte baten ordainarekin obsesionatua dagoen emakume baten istorioa kontatzen da.
Zuzendari batzuk ez dira berriak Kimuaken; Asier Altunak eta Lander Camarerok joan den urteko edizioan hartu zuten parte Zela Trovke eta A Political Story lanekin.
Katalogo berria datorren irailean aurkeztuko da ofizialki, Donostia Zinemaldian.