Ekainaren 18ra bitartean, Iñaki Marcaida argazkilariak Kristalaren Atzean erakusketa paratu du Zarautzeko Photomuseum aretoan.
Egileak berak azaldu ditu lanaren nondik norakoak: “50 urte baino gehiago daramatzat argazkizale lanetan, eta hamaika irudi atera ditut; kontatu gabeko istorioz betetako paisaiak, aurpegiak, uneak, surrealismoa eta abar, baina erakusleihoen gaineko argazki-proiektu berri honek nire pasioa eta artea lurralde berri batera eraman ditu. Proiektu honen ideia kristalean kanpoko islak zituen DIOR etxearen erakusleiho baten aurrean sortu zen. Interesgarria iruditu zitzaidan, eta garatzen hasi nintzen…
Kristal gaineko isla ez da soilik efektu bisuala, konposizioari sakontasuna eta konplexutasuna gehitzen dizkion funtsezko elementua baizik.
Eszena horiek harrapatzean, arruntetik haratago doazen irudiak sortzen saiatzen naiz, existitzen denaren eta islatzen denaren arteko elkarrekintzan ezkutatutako edertasuna azaleratuz.
Erakusleihoaren edertasuna bere bikoiztasunean datza. Alde batetik, ikusiak izateko diseinatutako atariak dira, eta, bestetik, ikuslea liluratzeko miniaturazko artelanak dira. Baina argazki hauetan, kanpoko isla den hirugarren aldaera sartu dut, eta horrek zenbait emozio sortzen dizkigu.
Argazki gehienak kameratik ateratzen diren berberak dira, baina batzuk nire begiek ikusten zuten errealitatea erakusteko ukituta daude.
Irudiek zure begien aurrean bizia hartuko dute, eta agian lehenago aztertu ez dituzun sentsazioak eta sentimenduak sentitzeko aukera emango dizute. Niretzat, argazkiak unearen aurretik eta ondoren lortzen diren bat-bateko argazkiak dira”.
