Asteon, Zuzenak Fundazioak antolatu ohi duen Laugarren Zinema eta Ahalmen Urritasuna Zinemaldia egingo dute Gasteizko Artium museoan, Ahalmen Urritasunaren Nazioarteko Egunaren harira. Hala, gaur bertan Frágil filma proiektatuko dute, 19:00etan. Emanaldiaren ostean solasaldia izango da Juanma Bajo Ulloa pelikularen zuzendariaren partaidetzarekin.
Bihar halaber, bi film labur eta dokumental bat ikusi ahalko dira; El palacio de la luna eta Inseparable de ti laburrak eta 1% esquizofrenia dokumentala. Filmon zuzendaria, Ione Hernandez, bertan izango da lanon inguruan aritzeko asmoz.
Etzidamu, hilak 30, David Pinillos-en Bon Appetit filma proiektatuko dute. Ondoren berbaldia izango da Jose Angel Iturberen eskutik.
Azkenik, ostegunean, abenduak 1, Miguel Gallardoren komikian oinarriturik eta Felix Fernandez de Castrok zuzenduriko María y yo autistei buruzko dokumentala izango da ikusgai. Gero Maru Soloresekin solasaldia izateko aukera izango da.
Emanaldi guztiak doakoak dira. Egitarauaren xehetasun guztiak Artiumen webgunean jasotzen dira.