Bilboko Aste Nagusian, abuztuaren 19tik 27ra, ospe handia duten konpainia eta artisten kale antzerkiko ikuskizunez osatutako programazio zabala izango da. Lanak bi eszenatokietan izango dira: Arriaga plazan eta Gas plazan.
Euskal konpainiak eta munduko beste herrialde batzuetako (Katalunia, Galizia, Kantabria, Madril, Erresuma Batua, Frantzia, Italia, Argentina eta Etiopia) 19 antzerki-taldek egingo dituzten umorezko, kalitatezko eta orijinaltasunezko ikuskizunez osatuko da aurtengo Aste Nagusiko antzerki-programa, non zirkua, magia, pailazoak, kabaret-a, argi jokoak, xaboi-burbuilak… arte-jakintza guztiak uztartuko diren.
Hala, Panpotx Kultur Elkarteak baso sorgindu batean murgilduko gaitu Baso liluragarria ikuskizunarekin; Trotamundos antzerki-taldeak istorioen kutxa irekiko du milaka kontakizun kanporatuz; Afrikara bidaiatuko du ikusleak, Etiopiara, hain zuzen, eta Robin Crusoe-ren uhartera ere mugituko da.
Aurrekoez gain lan batzuk estreinatuko dira, eta Aste Nagusian lehen aldiz ikusteko aukera izango da: Chipolatas konpainiaren Chipolatino ikuskizuna; Fekat Circus konpainiaren The rise of the full moon ikuskizuna; Circ Bivouac talde frantsesaren Le Rêve d’Erica lana. Horiez gain, sarituak izan diren zenbait lan ikusteko aukera izango da, hala nola, Valladolideko Kale Antzerkiko Off Jaialdian saritua izan den Pas & Company talderen Juguete Roto ikuskizuna, eta Leioako Umore Azokan sari berezia jaso zuen Trapu Zaharra euskal taldearen Sefiní lana.
Malicia y el Pequeño Judas antzerki taldeak, Kukai Dantza taldeak, Trotamundos antzerki-taldeak edota Gari Montxo eta Joselontxo taldeak ere euren ikuskizunak eskainiko dituzte.
