Alberto Gastesiren lehen film luzea Gelditasuna ekaitzean da. Loreto Mauleón eta Iñigo Gastesi protagonistak dira bertan, eta maiatzaren 12an estreinatuko da zinema-aretoetan. Vidania Filmsen ekoizpena da, eta Eusko Jaurlaritzaren eta EiTBren babesa izan du.
Horrela, Donostiako Nazioarteko Zinemaldiaren 70. edizioan mundu mailako saria jaso zuen film hau areto komertzialetara iritsiko da. Lanak Xixongo Nazioarteko Zinemaldian, Eivissako Zinema Independentearen Nazioarteko Jaialdian, Euskal Zinemaren eta MAFIZen Astean (Malagako Zinemaldia) eta Bartzelonako D ‘A Jaialdian parte hartu du.
Pieza zinematografikoaren sinopsia hauxe duzue: Lara Paristik itzuliko da bere bikotekidearekin, Donostian finkatzeko prest. Danielek ez du inoiz hiria utzi; neska-lagunarekin bizi da eta amaren higiezinen agentziarentzat egiten du lan. Lara eta Danielen bideak salgai dagoen etxebizitza baten bisitan gurutzatuko dira, baina agian hau ez da haien bizitzak gurutzatu diren lehen aldia. Iraganaren eta orainaren artean, istorioak bi pertsonaren arteko maitasun-harremana aztertzen du, izan ere, haien bizitzek, beste egoera batzuetan, beste bide batzuk hartuko zituzten.
