LUMAfest! jaialdiak literatura sorkuntzaren aldeko apustua egiten du, izan ere, Gipuzkoako gazte literatura eta sorkuntza jaialdia da, eta bere helbururik nagusiena gazteen artean idazkera eta irakurketa kritikoa bultzatzea da. Aurten, KMK-ko Ganbara Aretoan izango da otsailaren 9, 10 eta 11an.
Lehen egun horretan, 18:00etan, Jasone Osoro eta Karlos Aretxabaleta idazlearen arteko solasaldia antolatu da. Jasone Osorok Festa (Elkar) aurkeztuko du, eta Karlos Aretxabaletak Sex-sua (Elkar) liburu berria. Horren ostean festibalak urtero antolatzen duen euskarazko kontakizun laburren lehiaketaren sariak banatuko dira.
Otsailaren 10ean, 18:00etatik aurrera, Elise Kovaren La caída del príncipe de fuego (Puck Editorial) lanaren aurkezpena egingo da.
Eta larunbatean, otsailak 11, 16:30etatik aurrera, Leire Vargasek euskarazko inprobisazio poetikoko workshopa egingo du eta Dena ametsa den irudipena (Elkar) liburua aurkeztuko du. Dena ametsa den irudipena poesia-liburua 2021ean argitaratu zuen Elkar argitaletxearekin, eta 2022ko otsailaz geroztik aretoz areto ari da eRRe bertso-emanaldiarekin.
Egun horretan ere, azken liburu sinadura egingo da Victoria Álvarez idazlearen eskutik, eta, ondoren, 18:00etan, Las Eternas aurkeztuko da, ikusleen artean onarpen handia izan duen girotze historikoko eleberria. Gaztelaniazko kontakizun laburren lehiaketako sarien banaketa larunbatean izango da, 19:00etan, eta edizio honi amaiera emango zaio.