ARTEA

John Gutmann argazkilariaren atzera begirakoa Rekalde Aretoan

John Gutmann erakusketaren aurkezpen-prentsaurrekoa egin da gaur goizean Bilboko Rekalde aretoan.

Mapfre Fundazioak, Arizonako Unibertsitateko Center for Creative Photographyren laguntzarekin, eta Bizkaiko Foru Aldundiaren Rekalde Aretoak John Gutmann-en 100 argazki baino gehiago aurkeztu dituzte. Iaz ere, Rekalde Aretoak Fazal Sheikh Amerikako Estatu Batuetako artistaren lan ikaragarri ederra erakutsi zuen, eta oraingo honetan, argazkilaritzari ateak berriro zabaltzen John Gutmann erakusketa paratu du.

John Gutmann argazkilaria (1905-1998) XX. mendeko argazkigintza amerikarraren maisuetako bat da. Artista modernoa, eta ingurua irudikatzeko gaitasun bereziaren jabe da, begirada zorrotzekoa. Honek guztiak argazkigintza garaikidearen gailurrera eraman du.

Madrilen erakutsi ostean, hemen egiten den artista honen lehen atzera begirakoa da. Horma zurietan eskegiriko pieza fotografikoak gaika daude sailkatuak: Deserrotutako ikuspegia, Metropoli berri batekin topatzea, Automobila, Irudi Amerikarrak, Paisaia Amerikarrak, Inauterietako espiritua eta Gerra-seinaleak tituluekin.

Irudi guztiak erreportaje dokumentalen mugetatik harantz doaz, eguneroko bizitza jasotzen duten adierazpide guztiz harrigarriak eta bereziak. Hala, autoak, graffitiak, iragarki itzelak, bazterreko pertsonak, kaleko kaosa, aniztasun etnikoa edota paisaiak islatuko dituzte bere zuri-beltzezko lanek.

Gaurtik eta datorren urteko urtarrilaren 8ra arte zabalik izango da erakusketa ikusgarria Bilboko Rekalde aretoan.

Erakutsi gehiago

Antzeko artikuluak

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Back to top button