ESZENA

Kalearte, Gasteizko “Kaleko Arteen Nazioarteko Erakustaldia” asteburuan

Bihar ostirala, ekainak 7an hasi eta asteburu osoan zehar, makina bat emanaldi programatu dira Gasteizko kaleetan, Kalearteren edizio berriarekin.

XIV. edizio horretan, 70 emanaldi iragarri dituzte eta horietako bi erabateko estreinaldiak izango dira. Gasteizko zein Euskal Herriko hainbat konpainiaz gain, Katalunia, Frantzia, Extremadura, Andaluzia, Balear Uharteak, Valentzia edota Madriletik datozen 35 konpainik osatuko dute aurtengo edizioa.

Hala, ostiralean, Euskal Herrian barna dabilen Gure Zirkua izango da Kalearteren egitarauari hasiera emango diona. Bertan, euskal zirku ibiltariak, gure artisten topaleku bihurtuz, magia, akrobaziak, malabareak, pailazoak, musika eta zirkuko diziplina ezberdinez gozatzeko aukera emango du, Musikaren Ibilbidean instalatuko den “karpa txiki baina goxoan”. Gure artistak gure hizkuntzan, mundu guztiari irekitako ikuskizuna eskainiko dute.

18:30ean, San Francisco aldapan, ile-apainketa artea bihurtzen den Osadia ikuskizuna eskainiko du Kataluniatik datorren taldeak. Bertan, antzerki bihurtzen dute ile-apainketaren eskulturgintza bizarginaren aulkian, ile-mozketaren erakusketa original eta probokatzailearekin. “Esertzeko adorea erakusten duten ausartentzat orrazkera harrigarri, bitxi eta berritzaileak sortuko dituzte artistek”, antolatzaileek ohartarazten dutenez.

19:00etan,  Zanguango gasteiztarren eskutik, Al otro lado kalez kaleko ikuskizuna izango da erdiguneko oinezkoen esparrutik abiatuta. Ikuskizun honek umore garratza, konprometitua, kritikoa eta originala dakar, antzerkigintzako bi jeinuren eskutik: Txubio Fernandez de Jauregui eta Miguel Garces.

Eta gauerdira arte luzatuko den ostiraleko egitaraua ere anitza eta oparoa da. Hala, 19:30ean, Enaren kontuak, 2princesesbarbudes kataluniarrak izango dira Aihotz plazan; 20:00etan, Begiradak, Sara Alvarez & Ortzi Acosta gasteiztarren eskutik Arka plazan; 20:00etan ere, Kale gorrian, Barsanti konpainairen eskutik Andre Mari Zuria plazan; 20:30ean  Gure Zirkuaren emanaldi berria; 21:00etan,  Rumbo al cementerio Teatro del Silencio Frantzia-Txileko konpainiaren eskutik;  21:00etan, Balcony Sessions, Jon Basagurenen kontzertua Goiuri jauregian; eta 22:30ean, Mur Kataluniako (CIA) 3en emankizuna, Foru plazan.

Eta asteburu osoa ere antzera dator.  Ikuskizunen egitaraua eta emankizunen xehetasun gehiago, hemen.

Erakutsi gehiago

Antzeko artikuluak

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Back to top button