Pony Bravo banda psikodelikoak Gasteizko Helldorado aretoan joko du gaur, eta bihar, berriz, Donostiako Lugaritz Kultur Etxean. Sevillako laukoteak Un Gramo de Fe (El Rancho, 2010) izenekeo lana aurkeztuko du gurean.
Pony Bravo 2006 urtean eratu zen Sevillan. Zenbait maketa plazaratu ondoren, 2008. urtean Si bajo de espalda no me da miedo izenburuko diskoa kaleratu zuen El Rancho diskoetxearen eskutik. Grabazio horrek kritika onak jaso zituen hainbat hedabidetan, tartean, Rock De Lux aldizkari espainiarrean. Disko horri esker, hainbat musika jaialditan jo zuten, Primavera Sound-en, Territorios Sevillan eta Sonoraman, besteak beste.
Iaz, Un gramo de fe izeneko bigarren lana plazaratu zuten eta egun lan hori aurkezten ari dira. Nabarmendu behar da Pony Bravok Creative Commons lizentziapean argitaratzen dituela bere lanak.
Laukote sevillarraren jarioan askotariko eraginak antzematen dira, tartean, psikodelia, post-punk, dub, eta kraut. Hala, gehien maite dituzten artisten artean honako hauek daude: Lee Perry, King Tubby, Burning Spear, Can, Talking Heads, Devo, Captain Beefheart, Pere Ub, Fela Kuti, Radio Futura, Derribos Arias edo Triana eta Veneno andaluziarrak.
Izan ere, adierazgarria da abeslariak abesterakoan erakusten duen kutsu andaluziarra. Azentu hori, gainera, ironiaz eta umorez beteriko hitzekin uztartzeko duten gaitasunak erabat originala egiten du Pony Bravoren proposamena.
