Álber Palomera pintoreak Diálectica izenburuko erakusketa paratu du Zarauzko Sanz Enean martxoaren 20a bitarte. Mugimenduan eta sekuentzian oinarritutako obra da Gipuzkoako kostaldeko herrian dagoena ikusgai.
Bertan dauden artelanak barruko paradoxak erakusten dituzte, eta figurazioaren eta abstrakzioaren nahasketa dute ardatz, marrazki, pintura, argazki eta testuen bitartez.
“Metaforak egiteko makina bezala funtzionatzen duen pintura da, begirada zorrotzeko ikuslea bilatzen duena, zentzu guztien erditzea ospatzeko. Goethek zioen bezala, aukerazko kideen bidez elkartutako irudiak dira, gainezka egin duen pinturaren bila doazenak”.
Lan dinamikoak dira, etengabe aldatzen ari direnak, mugimenduan dauden film bateko fotograma piktorikoak bailira. Hala, mugimenduaren inguruko hausnarketak direla esan daiteke. Koadroak desmuntatuta agertzen dira, barruko egiturak deseginda.
“Obrak gogoeta egiten du mugimenduaren teorian, segidan, zinean, argazkian, kaleidoskopio-collagean, errepikapenaren estetikan, irudiaren mutazioan eta keinuaren eta orbanaren konbinazio polifisikoan”.
