Donostiako Tabakalerak 10. Feministaldia hartuko du gaurtik ostiralera bitarte. Plazandreok plataformak sortutako kultura feministari buruzko jaialdia da Feministaldia. Bada, gaur bertan hasiko da Lorena Cabnal eta Magdanela Leonen partaidetzarekin, Tabakalerako Z aretoan, 18:00etan.
Bi pentsalariak kapitalismoa eta generoaren arteko harremanaz arituko dira. Feministaldiaren arabera, “egungo ekonomia eta jendarte sistemak generoari dagozkien botere harremanetan nola oinarritzen diren aztertuko dute”. Horrekin batera, atzo, Donostiako emakumeak 1870-2015 izenburuko erakusketa inauguratu zen, Donostiako Emakumeen Etxean.
Ostegunean, hilak 17, Yes we fuck! Dokumentalaren emanaldia eta mahai-ingurua izango dira, 18:30etik aurrera; Antonio Centeno zuzendari eta ekintzaileak parte hartuko du ekitaldi horretan. “Aniztasun funtzionala duten gorputzei ukatutako sexualitatea azaleratzen duen dokumentala da. Akats eta elbarritasunetik definitutako gorputzei ukatutako sexualitate propioa eta gorputzarekiko autogestioarekiko eskubidea”.
Ostiralean, 18:30ean, artearen eta feminismoaren arteko harremana izango dute hizpide, O.R.G.I.A./Cabello/Carceller –en eskutik. Gero, 20:30ean, performanceak izango dira Sahatsa Jauregi eta Magmadam soinu-sortzaileen eskutik.
Azkenik, larunbatean, makina bat jarduera izango dira: Mugaren arkitektura: Kartzela, Kontaktu pedagogia berriak: pedagogia feministen eta estrategia performatiboen arteko gurutzaketa; Euskalgintza eta Feminismo, Erractus performancea, disko jartzaileak…
Egitaruari lotutako xehatasun guztiak: feministaldia.org.
