Lasala konpainiak Shine ikuskizun berria estreinatuko du Victoria Eugenia Antzokian, azaroaren 5ean.
Zertan sinets dezakegu gure XXI. mendeko hutsunea baretzen saiatzeko? Nola distiratu, jada ezin badugu norberarengan sinistu? Galdera horietan oinarriturik da Judith Argomanizek zuzendutako dantza konpainia donostiarraren hamabosgarren lan hori.
Shine pieza berri honen bidez konpainiak bizi garen garaietako askatasunaren kontzepzioaren inguruan hausnartzeko gonbitea luzatu nahi dio publikoari.
“Arrakastaren eta gorputzaren martirioaren ideia agertzen da obran, gaur egungo gizartea aztertzen. Lana oihu desesperatu bat da, gorputzaren objetualizazioa, hedonismoarekiko adikzioa, epe laburreko mendekotasuna eta ihesaren etengabeko bilaketa jorratzen dituena. Pieza, dantzaren kodeetan, spoken-word-ean, soinuan eta eszenaratze baten distiran oinarritutako esperientzia da. Eszenaratze horretan, zortzi interpreteren gorputzek gizarte/linbo horren distirak eta ispiluak islatzen dituzte, nortasuna definitzea da helburua. Lanak gure espiritualtasunaren definizioa bezalako gaiak jorratzen ditu, orain arteko irizpenen arabera.”
Duela egun batzuk, urriaren 30ean, Victoria Eugenia Antzokiko Dantza Aretoan dantza tailerra egin zen taldearekin. Lantegi hori konpainiaren ekoizpen berriaren estreinaldiari lotutako jardueren barruan kokatzen da, eta dantzan esperientziarik ez duten helduei zuzendutako espazio koreografiko sortzailean datza. Ikuspuntu ludiko batetik, dantzaren zenbait oinarri aztertu ziren, hala nola gorputzaren kontzientzia, espazioaren bilakaera, musikaren eta erritmoaren arteko harremana.
