Joan Mari Irigoien euskal idazle porrokatuak bere azken lana argitaratu du: Pistolak eta epistolak (Elkar)
Betiko legez, Joan Mari Irigoienek ez du epel utziko bere lan berria hartuko duen irakurle gaztea. Lehen 20 orrialdeetan, zita bitxiak, eskerrak, eta Gallardoneren kode penalaren hainbat ohar dakartza. Honetaz gain, irakurleari eginiko hitzaurre mardula, eta tartean, aholkuak: “ ez zaitez botereaz fida”.
Urunia hiriburu fantasiazko bezain errealean kokatu du Joan Mari Irigoienek gazte literaturako eleberri hau, non boterearen gehiegikeriak salatzen dituen, parodiaren eta ziriaren bidez. Batetik, alkate megalomano bezain autoritario bat agertzen da, udaltzainburu eskumakila alboan duela; bestetik, kalean pintatzen duen gazte bohemio bat, bere txakurrarekin bizi dena eta adineko alargun bat lagun duena. Eta tartean, hainbat abentura barregarri eta gogoeta hausnargarri.
Joan Mari Irigoien (Altza, 1948) ingeniaria da ikasketaz eta idazlea lanbidez. Eleberriak idatzi ditu batez ere (Babilonia, Consummatum est, Lur bat haratago, Arma, tiro, bammm!…), baita poesia eta haur literaturako hainbat liburu ere.
Beste aldetik, Aguas turbias, aguas limpias (Ttarttalo) lana ere publikatu du.
