Donostiako Alde Zaharrean, ostiralean eta larunbatean, uztailak 18 eta 19, egingo den arte eszenikoen topaketa da Dantza Edit; ekimena Noventa Grados eta liquidDocs-ek kolektiboek ondu dute.
Bada, bi egun horietan Alde Zaharreko kaleak arte eszenikoz beteko dira, eta makina bat diziplinaz gozatzeko parada izango da: performanceak, ikus-entzunezko proiekzioak, arte-instalazioa…
Ekitaldi horietan Mikel Aristegui, Anakrusa, Lasala Konpainia edo Ai Do Project artistek parte hartuko dute, besteak beste. Ekitaldiok ostiralean hasiko dira, 20:00etan, eta larunbateko gauerdira arte iraungo dute.
Inaugurazio festa ostiralean izango da, 20:00etan, Noventa Grados lokalean; bertan, bilduko direnen artean hauexek daude: Ekain Olaizola (Urpeko Dantza); Jon Diaz (Kontxo-Kortxo); PATIO (Spins Me Around), edo Destino DJ Set.
Antolatzaileek topaketaren harira egindako esku-orria eskuragarri dago sarean: gaur.donostia.org.