Bilboko Udalak antolaturiko XVII. Blas de Otero-Ángela Figuera Poesia Sariak eta XXV. Miguel de Unamuno Saiakera Sariak banatu dira.
Poesia eta saiakera literatura-sari hauek urtero deitzen dira, sariei izena ematen dieten idazle bilbotarren oroimena eta lana bizirik mantentzeko helburuz, eta era berean, sorkuntza literarioa hauspotzeko helburuz.
Blas de Otero-Ángela Figuera 2024 Poesia Sariak lehiaketako euskarazko modalitatean, Iban Garro Alzuri izan da saritua, Euri Beroak lanagatik. Epaimahaiak azpimarratu duenez, “poema liburu hau oso ondo egituratuta dago, tonu eta erritmo egokietan. Nabarmentzeko da ere bere originaltasuna prosa poetikoa eta lirika uztartzen dituenean eta egileak ironiaren eta itxaropenik ezaren arteko jolasa mantentzen duen hizkuntza poetikoa erabiltzen duenean”.
Kimikan lizentziatua Donostiako Euskal Herriko Unibertsitatean, Iban Garro hainbat poesia-lanen egilea da. Larrosa bat Groenlandian lanarekin Iruñea Hiria saria irabazi zuen 2023an.
Gaztelaniaz, David López Sandoval izan da irabazlea Arte Menor lanagatik. Egile kordobarra Hispaniar Filologian doktorea da Murtziako Unibertsitatean, eta Gaztelania eta Literatura irakasten ditu. Eleberria, antzerkia eta batez ere poesia idatzi ditu.
Sari hauek 5.500 eurokoak dira modalitate bakoitzeko eta ondoren argitaratuko dira.
Miguel de Unamuno Saiakera Lehiaketaren XXV. edizio honetako euskarazko modalitatean Mitxelko Uranga Álvarezek jaso du saria, Emognosioa Egia-ostea, Konspiranoia eta negazionismoa lanagatik. Epaimahaiak honako hau esan du: “gaurkotasun handiko gai bati heltzen zaio eta, gainera, gaiari buruzko hausnarketa sakona egiten da hainbat helegiteren bidez.” Filosofian doktorea, Mitxelko Urangak diziplina hori irakasten du Bigarren Hezkuntzan eta masterreko irakaslea da Udako Euskal Unibertsitatean. Hainbat saiakera eta lan poetiko argitaratu ditu.
Jorge Fernández Gonzaloren Paradigmas migrantes. Estéticas y experiencias migratorias de mujeres saiakera izan da irabazlea gaztelaniazko modalitatean. Jorge Fernández Gonzalo Filologia Hispanikoan (UCM) eta Filosofian (UAM) doktorea da, eta gaur egun Filosofiako irakaslea da Madrilgo Complutense Unibertsitatean
Kasu honetan, bi egileek 6.000 euroko saria jasoko dute, eta euren saiakerak argitaratu egingo dira.
